Pinarangalan ng Commission on Higher Education (CHED) ang anim na mag-aaral mula sa Quezon City University (QCU) robotics team matapos nilang magtagumpay sa Philippine VEX Robotics National Championship. Dahil sa kanilang pagkapanalo, nakuha nila ang prestihiyosong puwesto sa darating na VEX World Robotics Championship na gaganapin sa Kay Bailey Hutchison Convention Center sa Dallas, Texas, USA, mula Mayo 9-11, 2025.
Bilang pagkilala sa kanilang natatanging tagumpay, ginawaran ng CHED Secretary Popoy De Vera, kasama sina Commissioners Ethel Agnes Valenzuela at Desiderio Apag III, ng Medals of Excellence at financial grants mula sa Tertiary Education Subsidy (TES) at Tulong Dunong Program (TDP) ang mga miyembro ng QCU robotics team: John Daniel C. Cimanes, Prince L. Docot, Raniel Rick F. Peñas, Enerjhun Q. Relon, Arturo D. Marte Jr. II, at Rencis R. Sumugat.
Ang VEX World Championship ay isa sa mga pinakaprestihiyosong kumpetisyon sa larangan ng robotics sa buong mundo. Mayroon itong Guinness World Record bilang pinakamalaking robotics competition sa buong mundo.
“Isa sa mga direktiba ni Pangulong Bongbong Marcos ay tiyakin na mas maraming mag-aaral ang mahikayat na pumasok sa mga STEM-related careers. Kaya naman, aktibong sinusuportahan ng CHED ang mga unibersidad sa modernisasyon ng kanilang kagamitan at pasilidad upang mabigyan ang mga estudyante ng oportunidad na magpamalas ng inobasyon sa agham at teknolohiya,” ani De Vera.
Binigyang-diin din niya na ang tagumpay ng QCU ay patunay ng patuloy na suporta ng gobyerno sa mga Local Universities and Colleges (LUCs) sa buong bansa.
Nagpahayag naman ng pasasalamat si QCU President Theresita V. Atienza sa suporta ng CHED, na aniya ay malaking tulong sa tagumpay ng mga estudyante. “Dahil sa suporta ng CHED at UniFAST, nagawa naming i-upgrade ang aming pasilidad upang mabigyan ng mas maayos na kapaligiran ang aming mga estudyante. Ang aming robotics laboratory ay bukas din para sa benchmarking ng ibang unibersidad,” pahayag niya.
Ang QCU robotics team ay bumuo at nagprograma ng mga robot upang lumahok sa iba’t ibang VEX skill challenges, kabilang ang rapid relays at high-stakes design challenges. Sila ay makikipagtagisan ngayon laban sa mahigit 100 unibersidad mula sa iba’t ibang panig ng mundo sa VEX University Category.
Nagpahayag din ng pasasalamat ang mga miyembro ng team sa natanggap nilang pagkilala at tulong-pinansyal. “Maraming salamat, CHED, UniFAST, at QCU sa award na ito. Hinihikayat ko ang ibang estudyante na may hilig sa agham at teknolohiya na ipagpatuloy ang kanilang pangarap at sumali sa mga kompetisyong tulad nito,” ani John Daniel Cimanes.
Dagdag naman ni Enerjhun Relon, “Taos-puso po kaming nagpapasalamat sa CHED-UniFAST sa ibinigay nilang financial assistance. Dahil po dito, mas gagaan ang aming pag-aaral at mas mapapabuti ang aming skills sa robotics.”
Dahil sa kanilang pagkapanalo sa pambansang kumpetisyon at sa patuloy na suporta mula sa kanilang institusyon, handa na ang QCU robotics team na ipakita ang husay at inobasyon ng mga Pilipino sa larangan ng robotics sa pandaigdigang entablado.#
