Pormal na inisponsoran at hinihimok ni Senador Imee R. Marcos ang pagpasa ng Charter Renewal ng National Housing Authority (NHA) o Senate Bill No. 2818 “An Act Strengthening National Housing Authority by Extending its Corporate Term and Rationalizing its Powers, Repealing for this Purpose Presidential Decree No. 757, series of 1975,” na nagpapakita ng importansya ng ahensya bilang pangunahing sektor ng mga proyekto at programang pabahay sa bansa, na may malaking gampanin sa pagbibigay ng mga abot-kaya at disenteng pabahay para sa pamilyang Pilipino.
“This proposed measure, Senate Bill No. 2818, seeks to strengthen the NHA by first increasing the capitalization from P5 billion to P10 billion, in addition to extending its corporate term for another 50 years,” pahayag ni Chairperson of the Senate Committee on Urban Planning, Housing and Resettlement Sen. Marcos.
“The bill also seeks to expand the powers and functions of the Authority to cover housing operations and even support services,” dagdag pa ng senadora.
Dahil dito, hangad ng senadora na suportahan ng kanyang mga kasamahan sa Senado ang panukala: “Sana ay manahan sa ating mga puso ang mensaheng ito at nawa’y sang-ayunan ng aking mga mahal na kasamahan sa Senado ang Senate Bill 2818 sa lalong madaling panahon.”
Bilang co-sponsor ng NHA bill, idiniin ni Sen. JV Ejercito sa kanyang sponsorship speech ang kahalagahan ng NHA sa pagpapatuloy ng mandato nito na magbigay ng de-kalidad na tirahan. “Para po sa mga halos wala, nakapagbibigay po ng pag-asa ang NHA sa pamamagitan ng mga programang pabahay na makatuwiran at makatao, nakabatay sa kakayahan at katayuan sa buhay,” pagbabahagi ni Sen. Ejercito.
“Mr. President, dear colleagues, I appeal for the immediate passage of the proposed measure seeking to renew the corporate life of the National Housing Authority,” dagdag pa ng senador.
Sa kabilang banda, nagpahayag din ng kahandaang maging co-sponsor si Senate Majority Leader Francis N. Tolentino ng nasabing panukalang batas na sumusuporta sa parehong layunin para sa ahensya ng pabahay.
Samantala, lubos na pasasalamat at kagalakan naman ang ibinahagi ni NHA General Manager Joeben Tai kay Senator Marcos. “Sa ating kagalang-galang na Senator Marcos, isang malaking suporta ang inyong inihatid sa aming ahensya at para sa aming mga benepisyaryo. Ngayong araw ang simula ng ating pag-asa para sa mas masigasig na programang pabahay sa ilalim ng Bagong Pilipinas ng ating Pangulo. Maraming salamat po, Senator Marcos,” ani NHA GM Tai.
Itinatag noong 1975 ang NHA bilang isang korporasyong pag-aari at kontrolado ng gobyerno. Nilagdaan noon ni Pangulong Ferdinand E. Marcos ang PD 757 na bumuo sa ahensya bilang isang sangay ng pamahalaan para sa pabahay ng mga mamamayang Pilipino.
Sa ngayon, ang NHA ay nagpapatupad ng iba’t ibang programa sa pabahay para sa mga informal settler na pamilya na nasa delikadong lugar, mga empleyado ng gobyerno, mga dating rebelde, mga katutubo at mga pamilyang apektado ng mga kalamidad at mga proyektong pang-imprastraktura ng gobyerno. Ito ay nasa ilalim ng administratibong pangangasiwa ng Department of Human Settlements and Urban Development.
Sa Hulyo 31, 2025, maaabot na ng NHA ang ika-50 anibersaryo ng Charter nito, hudyat na magwawakas na ang tungkuling pang-korporasyon gaya ng nakasaad sa mandato nito.#
