Pinangunahan ni National Housing Authority (NHA) General Manager Joeben Tai ang paggawad ng pabahay sa 109 na pamilyang biktima ng armed conflict sa pagitan ng government forces at Moro National Liberation Front (MNLF) Misuari sa Zamboanga City.
Ang Ayer Village Subdivision Phase III ay matatagpuan sa Brgy. Sta. Barbara, Zamboanga City, kung saan ang komunidad ay binubuo ng dalawang palapag na bahay at naglalaman ng kusina, banyo, kuwarto at labahan.
Bago ang paggawad ng pabahay, nagsagawa muna ng inspeksiyon si NHA GM Tai upang matiyak ang kalidad ng nasabing proyekto.
Sa ilalim ng mandato ng NHA sa Calamity Housing Program, ang mga nasalanta ng kalamidad ay may karapatang magkaloob ng ligtas at komportable na mga bahay na kayang lampasan ang kahit anong sakuna. Bukod dito, mayroon ding programang pangkabuhayan, oportunidad sa trabaho at skills-enhancement sessions upang masiguro ang mauunlad na komunidad.
Samantala, ang mga biktima ng kalamidad ay nakatatanggap ng tulong pinansiyal mula sa Emergency Housing Assistance Program (EHAP) ng NHA.
Patunay rito, namahagi kamakailan lang ang NHA ng tig-P10,000 ayuda sa 438 pamilyang nasunugan sa Muntinlupa City.
Nagtayo rin ng information booth ang NHA upang isulong ang mga programa ng ahensiya. Ito ay bilang pakikilahok ng NHA sa pagdiriwang ng Health Workers’ Day sa Department of Health (DOH) Main Office sa Manila.#
