Inilapit ng National Housing Authority (NHA) ang serbisyong pabahay ng pamahalaan sa mga taga-Subic sa pamamagitan ng LAB FOR ALL Caravan ni Unang Ginang Marie Louise Araneta-Marcos na ginanap kamakailan lang sa Subic Bay Exhibition and Convention Center.
Para sa mas progresibo at maunlad na pamahalaan, ang pangunahing layunin ng nasabing caravan ay ang pagkakaloob ng tulong-pangkalusugan sa buong bansa sa pamamagitan ng libreng konsultasyong medikal, pagsasagawa ng mga simpleng laboratoryo at diagnostic services, family planning, at pamamahagi ng mga libreng gamot alinsunod na rin sa RA 11223 o ang Universal Healthcare Act.
Bilang pakikiisa sa layunin ng Unang Ginang at pagsasakatuparan ng mga adhikain ni Pangulong Ferdinand R. Marcos, Jr. para sa isang Bagong Pilipinas, patuloy ang NHA sa paglahok sa nasabing aktibidad sa pamamagitan ng isang information booth na naglalayong sagutin ang mga katanungan ukol sa mga programa ng Ahensiya at ng iba pang tulong-pabahay na maaaring ipagkaloob sa mga benepisyaryo.
Bukod sa information booth, namahagi rin ang Ahensya ng Php 720,000 na ayuda sa ilalim ng Emergency Housing Assistance Program (EHAP) — isang programang pabahay na nagbibigay ng tulong-pinansyal para sa mga biktima ng kalamidad.
Bilang kinatawan ni NHA General Manager Joeben A. Tai, pinangunahan ni Region III Manager Minerva Y. Calantuan ang pamamahagi ng nasabing ayuda sa 130 pamilyang labis na naapektuhan ng pananalasa ng Bagyong Paeng sa munisipalidad.
Samantala, mayroon ding libreng serbisyong ligal, tulong-edukasyon, at pagsasanay para sa iba’t ibang kaalaman sa nasabing caravan.
Para sa taong 2024, nakarating na ang caravan sa mga lalawigan ng Quezon, La Union, at Zamboanga na kung saan kasama sa mga nakilahok dito ang NHA.#
