Matapos ang mahigit isang taon na negosasyon, pormal nang pinirmahan ng National Housing Authority (NHA) at ang opisyal na unyon ng mga empleyado nito, ang Consolidated Union of Employees (CUE), ang kanilang ika-siyam na Collective Negotiation Agreement (CNA) sa seremonyang isinagawa kamakailan lang sa NHA Main Office.
Ang bagong CNA ay naglalaman ng mahahalagang probisyon, kabilang ang pagbibigay ng transportation assistance para sa lahat ng empleyado ng NHA sa buong bansa at ang pagpapalakas ng mga pasilidad at kagamitan sa medisina upang suportahan ang kanilang pisikal at pangkaisipan na kalagayan. Kabilang sa mga pinahusay na aspeto ang pagbuo ng mga programang pangkalusugang mental at ang pagbibigay ng emergency hospitalization assistance para sa mga empleyado na maoospital habang ginagampanan ang kanilang opisyal na tungkulin.
Ang 9th CNA ay magiging epektibo mula ngayong taon hanggang 2028, kung saan nakapaloob din ang probisyong na karagdagang isang taong extension alinsunod sa Public Sector Labor Management Council (PSLMC) Resolution No. 1, s. 2022. Ang resolusyon na ito ay nagpapalawig sa bisa ng bawat CNA mula tatlong taon hanggang apat na taon.
Sa kanyang mensahe, ipinaabot ni NHA General Manager Joeben Tai ang kanyang buong suporta sa bagong CNA at tinuturing itong isang “tagumpay” at “isang tunay na patunay ng dedikasyon at pagsisikap ng mga opisyal ng CUE at pamunuan ng NHA, kasama ang lahat ng mga taong kabilang dito.”
Binigyang-diin din ni NHA Assistant General Manager Alvin S. Feliciano, na kumatawan kay NHA GM Tai sa pagpirma ng kasunduan, ang kahalagahan ng CNA sa pagbibigay-prayoridad sa kapakanan ng mga empleyado at pagkilala sa kanilang mga karapatan bilang manggagawa.
Samantala, pinasalamatan naman ni CUE President Joselito R. Villanueva ang bumubuo ng CUE at Management CNA Panels sa kanilang pagsisikap sa pagbuo ng 9th CNA at nagpahayag ng pag-asa na ang maayos na relasyon na naitatag sa pagitan ng NHA at CUE mula nang nilagdaan ang kanilang kauna-unahang CNA noong 1995 ay magpapatuloy sa mga susunod pang mga taon.
Noong 1995, ang NHA at CUE ay lumagda sa kanilang unang CNA, na kinilala ng Civil Service Commission (CSC) at naging kauna-unahang ahensya ng gobyerno na nagpatupad ng nasabing kasunduan.#
