Iginawad ng National Housing Authority (NHA) ang 100 na pabahay sa mga pamilyang kabilang sa Tribung Subanen sa Zamboanga del Norte bilang pagtupad sa pangako nitong makapaghandog ng matitibay at permanenteng mga tirahan sa mga katutubong Pilipino.
Bilang kinatawan ni NHA General Manager Joeben Tai, pinangunahan ni Zamboanga District Officer-in-Charge Atty. John Louie G. Rebollos, kasama si Liloy Mayor Roberto Uy, Jr., ang seremonya ng pamamahagi.
Ang mga pabahay ay may sukat na 24.80 sqm floor area at sadyang itinayo bilang semi-concrete upang labanan ang mga kalamidad na madalas na nakakaharap ng Tribung Subanen sa bulubunduking lugar kung saan sila matatagpuan.
Dagdag pa rito, ang bagong komunidad ay sinigurong maayos at malinis, mayroong solar panel at pangkalahatang hand pump well upang magarantiya ang kanilang mga pangunahing pangangailangan.
Matatagpuan sa bayan ng Liloy na tinaguriang “Peanut Capital of Zamboanga del Norte,” ang Liloy Subanen IP Housing Project ay isa sa mga proyektong pabahay ng NHA sa ilalim ng Housing Assistance Program for Indigenous Peoples (IPs), na naglalayong magbigay ng pabahay sa mga kapatid nating katutubo sa iba’t ibang panig ng bansa.
Ang proyektong pabahay na ito ay ipinatupad bunga ng masusing pag-aaral at sa pakikipagtulungan ng National Commission on Indigenous Peoples (NCIP), mga pinuno ng komunidad at ng lokal na pamahalaan.
Ang Liloy Subanen IP Housing Project ay idinisenyo din nang may pagsasaalang-alang sa mga paniniwala, kaugalian, tradisyon, at kultura ng tribu.#
