Isang malaking karangalan ang nakamit ng isang kompanyang Pinoy matapos itampok ng United Nations ang kanilang makabagong teknolohiya para sa paglilinis ng wastewater o ginamit na tubig.
Ang i-TECH Packaged Sewage Treatment Plant (STP) ng Manila Water Infratech Solutions (MWIS) ay kabilang sa mga hinangaan at itinampok na Green Urban Energy Solutions sa aklat na Green Technology Book – EXPO 2025 Special Edition na inilathala ng World Intellectual Property Organization (WIPO) ng United Nations.
Ang publikasyong ito, na inihanda para sa darating na EXPO 2025 sa Osaka, Japan, ay naglalaman ng mahigit 200 mga teknolohiya at solusyon para sa malinis na enerhiya na angkop gamitin sa mabilis na umuunlad na rehiyon ng Asia-Pacific.
Ayon sa UN WIPO, nananatiling malaking hamon ang kaligtasan ng tubig, lalo na sa mga umuunlad na bansa. Nangangailangan ng malaking enerhiya ang mga sistema sa lungsod para sa pagbomba, paglinis, at pamamahagi ng tubig. Kaya’t ang mga makabagong solusyon tulad ng i-TECH Packaged STP ay napakahalaga upang makatipid ng enerhiya at mapangalagaan ang ating pinagkukunan ng tubig.
Epektibo, Matipid, at Nakatutulong sa Kalikasan
Ang i-TECH Packaged STP ay kinilala bilang isang bagong teknolohiya para sa mabisang pagtreat ng wastewater sa mga maliliit hanggang katamtamang lugar. Gumagamit ito ng advanced membrane bioreactor (MBR) technology na kilala sa mga sumusunod na benepisyo:
Mataas na Kalidad ng Tubig: Ang tubig na nalinis gamit ang MBR ay maaaring gamiting muli para sa pagdidilig at mga proseso sa industriya.
- Matipid sa Enerhiya: Sinusuportahan nito ang mas episyenteng paraan ng aeration, isang mahalagang hakbang sa paglilinis ng tubig.
- Hindi Nangangailangan ng Malaking Espasyo: Compact ang disenyo nito kaya ideal para sa mga lungsod na limitado ang espasyo.
- Mas Kaunting Basura: Nakakababa ito ng dami ng sludge o latak na nalilikha, na siyang nakakapagpababa rin ng gastos sa pagtatapon.
- Mas Mabisang Paglinis: Kayang alisin ang mas maraming dumi, kabilang ang mga bakterya at virus, kumpara sa mga karaniwang planta.
Ang MBR system ay laganap na ngayon sa mga bansang tulad ng China at Japan at karaniwang ginagamit sa mga lungsod, industriya, at maging sa mga gusali o maliliit na komunidad.
Ang pagkatampok ng i-TECH Packaged STP sa internasyonal na publikasyon ay sumasalamin sa dedikasyon ng MWIS na maghatid ng smart, scalable, at sustainable na solusyon para sa tubig ng mga komunidad at industriya sa Pilipinas. Ito ay isang patunay na ang galing ng Pinoy ay kahanay ng mga nangungunang solusyon sa buong mundo para sa isang mas malinis at mas matatag na kinabukasan.#
