Pinangunahan ni Mayor Joy Belmonte ang pagpapasinaya sa apat na modernong pasilidad sa Amoranto Sports Complex na layong maging lugar ng lokal na pamahalaan ng Lungsod Quezon upang magsagawa ng mga lokal at pandaigdigang paligsahan ng isport.
Ang ginawang world class facilities ng lungsod ay ang Amoranto Sports Arena na may 3,500 seating capacity, ang 10-lane Olympic-size Amoranto Swimming Pool, ang multi-level Amoranto Parking Building, at ang Open Tennis Court na bahagi ng Amoranto Indoor Sports Facility.
Matatandaan na ang Amoranto Sports Complex ay pinasinayaan noong 1966 ni dating Pangulong Ferdinand Marcos. Ang pasilidad ay itinayo sa halagang ₱2 milyon sa isang lugar na pag-aari ng gobyerno sa Roces Avenue. Ang pasilidad noon ay binubuo ng isang grandstand, isang eight lane track at field oval, bleachers at isang gymnasium.
Ang 2013 POC-PSC Philippine National Games ang huling pagkakataong nagamit ito at nanirahan ang mga Pambansang siklista sa loob ng complex hanggang taong 2017. Dahil sa bihira na gamitin ay nasira ang velodrome ng complex. May mga planong i-renovate ang lugar mula noong 2016. subalit hindi naging matagumpay na maipasa sa international standards ang velodrome at iminungkahi na magtayo ng bago.
Ayon kay Mayor Joy, layunin ng lungsod na i-ayon sa international standards ang pagsasaayos ng Amoranto Sports Complex at iba pang sports facilities sa QC. Kabilang rin dito ang pagpapataas ng antas ng isports sa lungsod at makatulong din sa pagsasanay ng mga atletang QCitizen.
Katuwang ng alkalde sa ribbon cutting sa apat na pasilidad sina Acting Vice Mayor Coun. Alex Bernard Herrera, City Administrator Mike Alimurung, Coun. Imee Rillo, Coun. Egay Yap, Coun. Irene R. Belmonte, Coun. Nanette Castelo Daza, at SK Federation President Coun. Noe Dela Fuente, QC department heads, mga opisyal at kawani ng mga barangay, at action officers ng bawat distrito sa lungsod.
