SEGURIDAD SA MAHAL NA ARAW PLANTSADO NA SA QC

IKINASA na ng Quezon City Police District (QCPD) ang plano nito para sa kinakailangang seguridad bilang paghahanda sa paggunita ng Mahal na Araw simula April 17-24.

Bilang paghahanda, magtatalaga ang QCPD ng kaukulang police personnel sa mga terminal ng bus at MRT station upang masiguro ang kaligtasan, laban sa anomang uri ng karahasan, ng mga magsisiuwing pasahero sa kani-kanilang mga probinsiya.

Maglalagay ng police assistance center at magsasagawa ng 24/7 foot, mobile at motorcycle patrol ang QCPD upang maiwasan ang posibleng krimen mula sa ilang mga mapagsamantala at matiyak ang kaligtasan ng publiko.

Inatasan ni Quezon City Mayor Herbert Bautista ang Department of Public Order and Safety (DPOS) sa pamumuno ni Gen. Elmo San Diego (Ret.) na makipag-ugnayan sa QCPD at sa mga opisyal ng barangay upang masiguro ang mapayapang pagdiriwang ng Mahal na Araw.

Ang Lungsod Quezon ang pangunahing ciudad sa Kamaynilaan na may maraming bilang ng bus terminal. Tinatayang libo-libong pasahero ang dumarating at umaalis ng lungsod araw-araw mula sa mga pangunahing terminal ng mga bus na bumibiyahe patungong hilaga at katimugang Luzon at maging sa Visayas at Mindanao .

Ipinag-utos rin ni Bautista ang pagbabantay sa mga residential area ng lungsod upang maiwasan ang nakawan na malimit na nagaganap sa mga kabahayang naiiwang walang tao tuwing panahon ng mahabang bakasyon.

Ayon kay QCPD director Benjardi Mantele, mahalaga ang kahandaan lalo na sa hanay ng publiko upang maiwasan ang anomang uri ng krimen at panloloko na karaniwang nagaganap dahilan sa kawalan ng personal na seguridad at paghahanda para sa kanilang sarili.

Upang matiyak ang maayos na daloy ng trapiko, magpapakalat ng tauhan si San Diego sa buong lungsod na tutulong sa mga tauhan ng QCPD at Metro Manila Development Authority (MMDA) -30- Rico/ Maureen Quinones, PAISO