Sa pagbubukas ng 3rd. regular session ng kamara na dinaluhan ng 216 na mga kongresista sa Batasang Pambansa ( July 27, 2015) naganap ang tinaguriang pinaka mahabang State of the Nation Address o Sona ng Pangulong Benigno Aquino III sa limang taon niyang panunungkulan sa bansa na umabot ng dalawang oras na nagsimula ng 4:00 ng hapon.
Agad na binanatan ng Pangulo ang nakaraang Administrasyon sa pag uumpisa ng kanyang SONA, ngunit iunulan siya ng ibat-ibang protesta sa labas at loob ng plenaryo.
Iniulat ng pangulo sa kanyang mga boss ang mga nagawa ng kanyang Administrasyon para sa bayan sa limang taon niyang panunungkulan, ito ang kanyang huling SONA ng kanyang termino.Ipinagmamalaki niya ang paglaban sa kahirapan at korupsyon sa kanyang Daang Matuwid.
Umapela naman ang pangulo sa kongreso na ipasa na ang BBL at aprubahan na ang Anti-dynasty bill, para wala ng pamilya ang naghahari-harian sa pulitika, ipinagmalaki din niya na ang Pilipinas ay tinaguriang Asia’s Rising Tiger at Asia’s Rising Star dahil sa pagtitiwala ng mga investor na magnegosyo sa bansa.
At sa sektor ng pangkalusugan iniulat din ng pangulo na mayroon ng 89.4 bilyong miyembro ng PhilHealth ngunit sa mga naisakatuparan na mga Gawain at programa ng kanyang Administrasyon ay bigo siya sa MRT at mai apruba ang Freedom of Information Bill.
Samantala, hindi pa rin maiwasang batikusin ng Pangulo ang nakaraang Administrasyon kaugnay ng mga problema ng bansa na kanyang namana, at tila walang anumang nabanggit ang Pangulo tungkol sa madugong Mamasapano Incident na kung saan ay may 44 SAF commandos ang namatay.
At sa pagtatapos ng kanyang huling SONA ay kanyang pinasalamatan niya si Sen. Mar Roxas at 86 na tao kasama ang kabinete, palace staff at maging ang kanyang maid.(Rhea Razon)
