Sa pagdiriwang ng World Food Day o Araw ng Pagkain ng Mundo, tinutulan ng marine conservation group na Oceana ang isang panukala ng pamahalaan na amyendahan ang Fisheries Code, na magbubukas sa munisipal na katubigan para sa malalaking komersyal na mangingisda. Ang mga katubigang ito ay nakalaan ngayon ayon sa batas para sa maliliit at lokal na mangingisda.
Ayon sa panukala, na isa sa mga prayoridad ng administrasyon, papayagang mangisda ang mga komersyal na barko sa mga munisipal na katubigan na may lalim na higit sa 20 dipa. Tinawag ni Oceana Vice President Von Hernandez ang plano na “isang pagnanakaw sa mga pinakamahirap ng bansa,” na magpapahamak sa kabuhayan ng maliliit na mangingisda at sa patuloy na pagliit ng mga isda sa karagatan.
Nababahala ang Oceana sa pagtutulakan ng pamahalaan na amyendahan ang Fisheries Code, na sumasalungat umano sa sarili nitong posisyon sa Korte Suprema. Kasalukuyan kasing hinihiling ng Bureau of Fisheries and Aquatic Resources (BFAR) na muling pag-isipan ng Korte Suprema ang kanilang desisyon noong Disyembre 2024 na nagpapahintulot sa komersyal na kumpanyang Mercidar na mangisda sa mga naturang protected zones—isang desisyong lalong pagtibayin ng panukalang amyenda.
“Paano masasabi ng pamahalaan na ito’y para sa food security o seguridad sa pagkain, kung papayagan naman ang malalaking kumpanya na lumustay sa mga yaman ng ating mga pinakamahihirap na komunidad?” pahayag ni Hernandez.
Idinagdag niya na direktang salungat ito sa mga pahayag ni Pangulong Ferdinand Marcos Jr. na nais pagtibayin ang seguridad sa pagkain at pagaanin ang kahirapan. Ayon sa pinakabagong datos, pangalawa ang mga mangingisda sa mga sektor na may pinakamataas na insidente ng kahirapan.
Kasabay ng pagbatikos, nakisama ang Oceana sa iba’t ibang civil society groups tulad ng PANGISDA Pilipinas at Kilusan para sa Pambansang Demokrasya sa isang serye ng mga protesta. Nagmartsa ang mga grupo ng mga magsasaka, mangingisda, at kabataan sa Quezon City at nagharap ng mga pagkilos sa harap ng mga tanggapan ng Department of Agriculture, BFAR, at Department of Environment and Natural Resources (DENR) upang igiit ang kanilang panawagan para sa food sovereignty o soberanya sa pagkain.#
