Nagtagumpay ang Bureau of Customs (BOC) na masamsam ang lahat ng 12 mamahaling sasakyan na iniuugnay sa pamilya Discaya. Nakuha ang mga ito sa isinagawang operasyon sa isang tanggapan ng contractor sa Pasig City, na aprubado ng korte, at nagpapakita ito ng mas pinaigting na laban ng gobyerno sa smuggling.
Nagsimula ang operasyon ngayong umaga sa headquarters ng St. Gerrard Construction General Contractor and Development Corp. Sa pamumuno ng Intelligence at Enforcement units ng BOC, dalawang sasakyan ang unang nakuha: isang 2024 Toyota LC300 at isang 2022 Maserati Levante Modena.
Subalit, ang natitirang sampung sasakyan ay una munang hindi natagpuan. Dahil dito, naglabas ng mahigpit na babala si BOC Commissioner Ariel F. Nepomuceno sa pamilya Discaya. Iginiit niya na tiyak na mahahanap ng ahensya ang mga sasakyan nang “walang pagkaantala.” Binigyang-diin niya na anumang iregularidad sa pag-angkat ng mga ito ay magbubunga ng buong pagkolekta ng mga dapat na buwis at duties, at ang sinumang nagtatago o tumutulong sa pagtatago ng mga sasakyang ito ay “parurusahan nang ayon sa batas.”
Nagbunga agad ang babala. Kinagabihan, kumpirmado ng BOC na pitong karagdagang sasakyan na ang isinuko at nakuha na sa compound ng St. Gerrard. Kabilang sa mga nasamsam ang ilan sa pinakamamahaling sasakyan sa mundo: isang Rolls Royce Cullinan, isang Bentley Bentayga, mga Mercedes-Benz G-Wagons, isang Toyota Tundra, isang Toyota Sequoia, at isang Cadillac Escalade.
Kumpirmado ni Commissioner Nepomuceno na ang huling tatlong sasakyan—isang GMC Yukon Denali at dalawang Lincoln Navigator—ay matatagpuan sa mga awtorisadong service center para sa pag-aayos at susuko na sa BOC sa lalong madaling panahon.
Ang lahat ng labindalawang sasakyan ay pormal nang sinelyuhan ng Customs at binabantayan nang 24-oras ng pinagsanib na personnel ng BOC at ng Philippine Coast Guard (PCG).
“Sinunod ng pamilya Discaya ang babala,” pahayag ni Commissioner Nepomuceno, at muling iginiit ang determinasyon ng BOC na panagutin ang mga dapat managot. Nagpasalamat din siya sa tulong ng iba’t ibang ahensya kabilang ang LTO, PNP, PCG, at mga opisyales ng Barangay Bambang, Pasig City sa tagumpay ng operasyon.
Ngayong nasa kamay na ng awtoridad ang mga sasakyan, ang susunod na tututukan ng BOC ay ang masusing pagsusuri sa mga papeles ng mga ito. Inihayag ng ahensya na masisiyasat na nang maigi ang mga importation records ng bawat sasakyan upang matiyak kung sumunod nga ito sa mga batas sa customs. Kung matutukoy ang anumang iregularidad o kakulangan sa binayarang duties at taxes, magsasagawa ng nararapat na aksyon ang BOC alinsunod sa Customs Modernation and Tariff Act (CMTA).
Ang nasabing operasyon ay naaayon sa direktiba ni President Ferdinand R. Marcos Jr. na paigtingin ang laban contra-smuggling, protektahan ang kita ng pamahalaan, at itaguyod ang prinsipyo ng transparency at accountability sa lahat ng transaksyon ng gobyerno.
Matatandaan na kasalukuyang nasa ilalim ng masusing pagsisiyasat dahil sa kanilang mga link sa malawakang mga kontrata sa gobyerno, partikular sa ilalim ng DPWH, at pati na rin sa isang imbestigasyon ng Bureau of Customs kaugnay sa iniulat na pagmamay-ari ng 40 luxury cars si Cezarah Rowena Discaya, isang negosyante at presidente ng Alpha and Omega General Contractor and Development Corp., at ang kanyang asawang si Pacifico “Curlee” Discaya.#
