Naglabas ng babala ang Department of Environment and Natural Resources – Mines and Geosciences Bureau (DENR-MGB) kaugnay sa posibleng panganib ng landslide at pagbaha na dulot ng inaasahang malalakas na pag-ulan sa iba’t ibang bahagi ng bansa, batay sa ulat ng DOST-PAGASA.
Ayon sa datos, tinatayang makakaranas ng 80-100mm ng ulan ang ilang lugar ayon sa Global Spectral Model (GSM), habang mas mataas na 120-150mm naman ang tinutukoy ng Weather Research and Forecast (WRF) model sa loob ng 72 oras.
Batay sa pagsusuri ng DENR-MGB, may kabuuang 3,009 barangay sa 15 probinsya sa mga rehiyon ng Bicol, Cagayan Valley, MIMAROPA, at Western Visayas ang nasa kategoryang “very highly susceptible” o may napakataas na posibilidad na tamaan ng landslide at baha.
Dagdag pa rito, 4,954 barangay mula sa 22 probinsya kabilang ang Cordillera Administrative Region (CAR), Ilocos Region, Calabarzon, at Central Luzon ang nasa “highly susceptible” na kategorya.
Sa National Capital Region (NCR), apektado rin ang 1,403 barangay, dahilan para sa agarang pagpapatupad ng mga pangunang hakbang ng pag-iingat.
Pinakamataas ang banta ng pag-ulan sa mga probinsya ng Occidental Mindoro, Antique, at Zambales, kung saan higit sa 80% ng mga barangay ang posibleng maapektuhan sa loob ng tatlong araw. Dahil dito, hinihimok ang mga lokal na pamahalaan na agad na kumilos upang maprotektahan ang kanilang mga nasasakupan.
Maaaring gamitin ng mga lokal na pamahalaan ang MGB Geohazard Portal upang matukoy ang antas ng panganib ng kanilang mga barangay.
Para sa mga lugar na nasa moderate hanggang high susceptibility sa pagbaha, ipinapayo ng DENR-MGB ang agarang pagpapakilos ng mga tauhan ng Disaster Risk Reduction and Management Office (DRRMO) upang bantayan ang lebel ng tubig sa mga ilog at magsagawa ng pre-emptive evacuation kapag lumapit na sa kritikal na antas na 0.5 metro. Pinapayuhan din ang mga awtoridad na alisin ang mga sagabal sa mga daluyan ng tubig upang maiwasan ang pagbaha.
Para naman sa mga barangay na landslide-prone, narito ang mga rekomendasyon batay sa antas ng panganib:
Low Susceptibility – Maging mapagmatyag sa mga debris flow o biglaang pagtaas ng agos ng tubig. Iminumungkahi ang koordinasyon sa mga barangay sa itaas ng dalisdis at posibleng paglikas.
Moderate Susceptibility – Bantayan ang mga bitak sa lupa o pag-uyog ng mga bahay. Ang mga nakatira malapit sa creek o bangin ay dapat isama sa plano ng paglikas.
High to Very High Susceptibility – Mariing inirerekomenda ang pre-emptive evacuation sa mga lugar na may aktibong paggalaw ng lupa. Hindi pinapayagang bumalik ang mga residente hangga’t hindi idinedeklara ng mga awtoridad na ligtas na.
Patuloy na nananawagan ang DENR-MGB sa kahandaan at pagiging alerto ng mga lokal na pamahalaan. Dapat ay aktibo ang mga emergency plan, malinaw ang komunikasyon sa mga residente, at ipinatutupad ang mga hakbang para sa kaligtasan ng bawat komunidad.
Habang papalapit ang mga araw ng inaasahang matinding ulan, mahalaga para sa lahat ng nasa panganib na lugar na sundin ang mga babala, manatiling may alam, at makiisa sa mga hakbang ng pamahalaan upang mabawasan ang pinsala mula sa mga kalamidad na ito.#
