WASHINGTON D.C.—Nagbabala ang ilang ekonomista at eksperto sa pinansya na maaaring humantong sa matinding kaguluhan ang bagong polisiya ni Pangulong Donald Trump na suportahan ang libo-libong pribadong “stablecoins” gaya ng Tether, Inc., habang bumabagsak ang halaga ng dolyar at tumataas ang utang ng gobyerno ng Estados Unidos.
Sa isang press conference noong Hulyo 8, inihayag ni Trump na ang pagkawala ng pandaigdigang pamantayan ng dolyar ay “parang matalo sa isang pandaigdigang digmaan.” Ngunit taliwas dito, itinutulak ng kanyang administrasyon ang paglikha ng mga pribadong digital na bersyon ng dolyar na walang sapat na regulasyon.
Sa unang kalahati ng 2025, bumaba ng 10% ang halaga ng dolyar kumpara sa ibang pangunahing pera—ang pinakamabilis mula pa noong 1973. Ayon sa mga tagapayo ni Trump, layunin umano nito na pasiglahin ang sektor ng pagmamanupaktura, ngunit patuloy pa ring bumababa ang trabaho sa sektor na ito.
Ang Tether, Inc., na nakabase ngayon sa El Salvador at hindi saklaw ng regulasyon, ay may hawak na mahigit 60% ng pandaigdigang stablecoin assets. Napatunayang may kontrobersiyal na kasaysayan ito, kabilang ang pagbabayad ng milyon-milyong multa dahil sa maling pag-uulat ng reserba.
Naipasa na sa Senado ng U.S. ang GENIUS Act na nagpapahintulot sa mga pribadong kumpanya na maglabas ng stablecoins kahit halos walang mahigpit na regulasyon. Tinawag ito ng mga ekonomista na isang panganib na maihahambing sa “wildcat banking” ng 1800s na nagdulot ng bank runs at kaguluhan.
Nagbabala si dating Greek Economics Minister Yanis Varoufakis na ang stablecoins ay isang “time bomb.” Maaaring magdulot ito ng paglipat ng deposito mula sa mga bangko papunta sa stablecoins, na magpapataas ng gastos sa pangungutang at magpapahina sa sistema ng U.S. Treasury.
Ayon kay economic historian Barry Eichengreen, uulitin ng GENIUS Act ang kamalian ng sistema ng pagbabangko bago ang Civil War, kung saan bawat bangko ay may sariling dolyar, na nauwi sa kaguluhan at krisis.
Kasabay ng patuloy na paglobo ng utang ng gobyerno ng Amerika, lumalaki rin ang yaman ng mga kaalyado ni Trump gaya nina Peter Thiel, David Sacks, at Elon Musk. Iniulat ng Bloomberg na lumago ng tinatayang $620 milyon ang personal na yaman ni Trump dahil sa mga hakbang na may kaugnayan sa crypto.
Samantala, tinatangkang gawing sentro ng crypto sa Kanluran ang London sa pamamagitan ng pagtanggap sa mga U.S. dollar stablecoins mula sa ibang bansa—isang estratehiya na kahalintulad ng ginawa nilang “Eurodollar” market noong dekada 50 at 60.
Ayon kay Paul Gallagher ng Executive Intelligence Review (EIR), dapat ibalik ang Glass-Steagall Act upang paghiwalayin ang commercial banking at speculation, at gawing pambansa ang Federal Reserve upang lumikha ng National Bank na tututok sa imprastruktura at pagmamanupaktura.
Binigyang-diin ng Bank for International Settlements (BIS) na kulang ang stablecoins bilang “sound money” at banta ito sa katatagan ng pananalapi. Si Prof. Paolo Savona, dating pinuno ng Italian market authority CONSOB, ay nagbabala rin na ang stablecoins at cryptocurrencies ay maaaring magdulot ng krisis na tulad ng naranasan noong 2008.#
