Tapat ang National Housing Authority (NHA) sa pangako nitong tulungan ang mga pamilyang apektado ng mga kalamidad sa pamamagitan ng Emergency Housing Assistance Program (EHAP) nito.
Namahagi ang NHA ng P1.195 milyon sa 209 na benepisyaryo mula sa Tanauan City, Batangas, na lubhang naapektuhan ng Severe Tropical Storm Paeng. Samantala, nasa kabuuang P1.160 milyon naman ang naibigay sa 58 pamilyang nasunugan sa lungsod.
“The NHA is one with the President Bongbong Marcos Jr. in aiding the housing needs of our Filipino families through our other programs and services,” saad ni NHA General Manager Joeben A. Tai.
Bilang kinatawan ni NHA GM Tai, pinangunahan ni Region IV Manager Roderick T. Ibañez ang pamimigay ng tulong-pinansyal sa mga benepisyaryong pamilya, kung saan saksi si Tanauan City Mayor Nelson P. Collantes sa kaganapan.
Sa ilalim ng EHAP, ang ahensya ay nagbibigay ng tulong-pinansyal sa mga pamilyang apektado ng mga kalamidad tulad ng bagyo, sunog, lindol, at pagbaha. Layunin ng programa na tulungan ang mga benepisyaryo na magsimulang muli sa pamamagitan ng muling pagsasaayos ng kanilang mga tahanan.#
