Sumailalim sa Constructors Performance Evaluation System (CPES) training ang 35 kawaning panteknikal ng National Housing Authority (NHA), na binubuo ng mga inhinyero at arkitekto mula sa iba’t ibang regional at district offices, mula Abril 17-19, 2024.
Ang mga lumahok sa tatlong araw na pagsasanay ay pormal nang itatalaga bilang mga kwalipikadong mag-inspeksyon at sumuri sa kalidad ng mga proyekto ng NHA, at pati na rin ang pagmarka sa production performance ng mga katuwang na developer at contractor.
Tinalakay sa unang araw ng pagsasanay sa NHA CPES ang rating system na ginagamitan ng mga pamantayang inaprubahan ng National Economic Development Authority (NEDA), alinsunod sa Section 13, Annex E ng Republic Act 9184. Dito rin mas nahasa ang kanilang kaalaman sa mga polisiya ng ahensya ukol sa implementasyon ng CPES sa mga proyekto nito.
Ang ikalawang araw ng naturang pagsasanay ay nakatuon sa pormal na paggamit ng CPES sa pamamagitan ng isang aktwal na inspeksyon at pagsusuri sa kalidad ng isang proyekto ng NHA, ang Mt. Arayat Residences sa Brgy. Telepayong, Arayat, Pampanga. Samantala.
Nagsagawa naman ng qualifying examination at pagkilala para sa mga bagong Constructor’s Performance Evaluators (CPE) noong panghuling araw.
Bilang pagtupad sa adhikain ni Pangulong Ferdinand “Bongbong” R. Marcos, Jr. ng isang Bagong Pilipinas, ang NHA, sa ilalim ng pamumuno ni General Manager Joeben Tai, ay patuloy sa inisyatibo nitong Building Better More (BBM) housing sa pamamagitan ng mga makabago at mabisang istratehiya, at paggamit ng mga disaster-resilient at environment-friendly na materyales para sa dekalidad na pabahay.
Patunay nito, ang mga bagong CPES evaluators ay handa na para sa kanilang tungkulin na siguraduhin ligtas, komportable, at disenteng pabahay ang ipinagkakaloob ng NHA sa mga pamilyang Pilipino.
Sa Mayo 15-17, 2024, panibagong serye sa pagsasanay ng NHA CPES ang isasagawa.#
