Kiamba, Sarangani – Tatlumpu’t apat na agrarian reform beneficiaries (ARBs) mula sa Kapate Agrarian Reform Beneficiaries and Farmers Association (KARBFA) sa bayan na ito ang nagsabing bumuti ang kanilang pamamahala sa negosyo sa bukid matapos nilang dumalo sa Farmer Business School (FBS) na isinagawa ng Department of Agrarian Reform (DAR).
Ang FBS, na 12-linggong sesyon sa agricultural entrepreneurship, ay alinsunod sa direktiba ni DAR Secretary Conrado Estrella III na itaas ang kaalaman ng mga magsasaka.
Ayon kay FBS graduate at best business plan awardee Fructuso Olaer, natulungan ng programang ito na mapaunlad ang kanilang abilidad sa pamamahala ng sakahan sa pamamagitan ng pag-uudyok sa kanila na magkaroon ng entrepreneurial mindset at mailabas ang kanilang kakayahan sa pagnenegosyo.
“Ang malaking ipinagpapasalamat ko sa FBS ay ang mga module kung saan itunuro sa amin ang prinsipyo ng agro-enterprising na napakahalaga para sa amin upang umunlad bilang mga negosyante,” aniya.
Sinabi ni Olaer na ang lahat ng kanyang mga kapwa magsasaka ay nagpasya na gagamitin nila ang estratehiyang pagnenegosyo na kanilang natutunan sa kanilang mga sakahan.
“Isinama ko sa aking plano sa negosyo ang tamang financial recording, na isang napakahalagang yugto sa isang negosyo sa pagsasaka. Maingat ko ring binuo ang farm schedule at klase ng mga itatanim ng naaayon sa kanilang input, gastos, at inaasahang kita,” pagpapaliwanag niya.
Sa kanilang seremonya ng pagtatapo, pinuri ni H. Roldan A. Ali, AL-HAJJ, DAR-Region 12 OIC-Assistant Regional Director, ang mga nagtapos at sinabi niya na bigyan ng importansiya ang panghabambuhay na pag-aaral at pagsasaliksik upang umunlad.
“Sa taglay ninyong business mindset, makikita ninyo ang mga oportunidad na lumalabas sa harap ninyo. Malalaman ninyo kung paano, kalian at saan ibebenta ang inyong mga produkto. Mabibigyan din ninyo ng konsidersayon na mag-value-adding upang mas lumaki ang kita,” ani Ali.
Bukod sa pagtuturo sa mga ARB sa mga paraan upang mapabuti ang negosyo, ang mga sesyon ng FBS ay nagbigay din sa mga miyembro ng asosasyon ng mga paraan upang mabuo ang kanilang pakikipagkaibigan, pagtutulungan ng magkakasama at ang diwa ng boluntarismo.
Makikita ito nang ipahiram ng dalawa sa pamilya ng Arciaga , na kasapi ng KARBFA ang kanilang mga lupa para sa pagsasaka ng gulay ng kanilang grupo. Ang mga ARB ay nagsagawa na ng kanilang unang pag-ani at magkakaroon uli sila ng mga susunod na pag-ani sa susunod na linggo.#
