Humingi ng tulong si Agrarian Reform Secretary Conrado Estrella III kay Pangulong Ferdinand R. Marcos, Jr. na isama ang mga agrarian reform beneficiaries (ARBs) sa mga tatanggap ng programang Medical Assistance for Indigent Patient (MAIP) ng Department of Health (DOH).
Ang MAIP ay isang programa ng DOH na nagbibigay ng tulong medikal para sa mga mahihirap na pasyente sa bansa na naghahanap ng konsultasyon, rehabilitasyon, pagsusuri o papapa-ospital sa mga pampublikong ospital.
Sinabi ni Estrella na bahagi ito ng 9-point priority areas na tinukoy ng DAR, bilang tugon sa panawagan ng Pangulo na ipagpatuloy ang agrarian reform program at pagtuunan ng pansin ang pangangailangan ng mga magsasaka sa buong bansa.
“Bukod sa pagbibigay ng mga solusyon sa mga problema sa seguridad ng pagmamay-ari ng lupa, pagbibigay ng hustisyang agraryo at pagkakaloob ng mga suportang serbisyo, isinasaalang-alang din natin ang iba pang mga pasanin na dalahin ng mga ARBs,” ani Estrella.
Sinabi ni Estrella na kailangan ding tugunan ng DAR ang mga medikal na alalahanin ng mga ARB, dahil karamihan sa kanila ay kabilang sa mahihirap na sektor ng lipunan.
“Karaniwang umuutang ang mga magsasaka sa tuwing nagkakasakit ang isa sa mga miyembro ng kanilang pamilya. Ang komprehensibong suporta mula sa DAR at iba pang pambansang ahensya ay kinakailangan upang mapagaan ang mga ganitong uri ng pasanin na dinadala ng mga magsasaka,” ani Estrella.
Binigyang-diin ni EstrelIa na iminungkahi na niya sa isa sa mga pulong ng Gabinete kasama ang Pangulo, na isama sa saklaw ng DOH ang mga ARB bilang mga tatanggap ng MAIP at tiniyak sa mga ARB na sila ay isasama sa nasabing programa pagsapit ng 2023.#
