Namahagi kamakailan ang Department of Agrarian Reform (DAR) sa Camarines Sur ng suportang pangkabuhayan sa mga agrarian reform beneficiaries (ARBs) sa ilalim ng Sustainable Livelihood Support for Disaster Affected Areas (SLSDAA).
Sa kabila ng malubak at maputik na kalsada patungo sa baranggay, si Chief Agrarian Reform Program Officer Rodel C. Martirez, kasama ang ibang mga empleado ng DAR Provincial Office ay matiyagang tinahak ang daan upang makarating sa barangay ng San Ramon para ihandog ang tulong pang-kabuhayan sa mga ARBs.
Dalawang egg-layering machine ang iginawad sa mga miyembro ng magsasaka ng San Ramon Farmers and Fisherfolks Association (SRFFA) sa San Ramon, Siruma, Camarines Sur noong Enero 7, 2021.
Ang mga makina ng itlog ay may kasamang 96 na mga paitluging-manok, 13 na sako ng patuka at gamot para sa mga manok.
“Malaking tulong ang proyekto sa mga ARBs sa Brgy. San Ramon ng Siruma, Camarines Sur sapagkat ang mga itlog na ipinagbibili sa kanilang lugar ay nagmumula pa sa kalapit na munisipalidad ng Tinambac at Calabanga, Camarines Sur. Sa livelihood na ito, makapagsusuplay na sila ng itlog para sa maga taga-rito,” sabi ni Martirez.
Ayon kay Martirez, bago ang turn-over na ito, nauna ng nakatanggap ang SRFAA ng mga hand tractor at rice thresher mula sa SLSDAA noong Agosto 20 ng nakaraang taon.
Sinabi ng Pangulo ng SRFFA na si Danilo Alcala na sa lahat ng tulong na pang-ekonomiya na ibinigay sa kanilang ARBO, laking pasasalamat nila dahil lahat ng mga miyembro ay nakikinabang dito. ### (Public Assistance and Media Relations Service, Department of Agrarian Reform)
