KALINISAN pa rin ang sagot upang mapigil ang dumaraming biktima ng Dengue sa bansa, yan ang sinabi ng masipag na Barangay Captain ng Payatas na si Gng. Rosario Dadulo.
Kilala ang Payatas bilang tapunan ng basura subalit kataka-takang ang naturang barangay ay walang rehistro ng mga namamatay dahil sa dengue. Si Kapitan Dadulo sa kabila ng kaliwa’t kanang batikos sa kanya ng iilan ay hindi maitatatwa ang resulta ng mga magagandang adhikain para sa kanyang barangay. Katwiran ni Kapitana kailanman ay taas noon sya at kayang humarap sinuman dahil kailanman ang kanyang pamamahalang ginagawa ay pawang tuon sa kabutihan at katagumpayan ng Payatas.
Katulad ng suliranin ng bansa sa dengue, tanging susi nya ay ang puspusan at walang humpay na kampanya ng paglilinis sa kabuuan ng Barangay Payatas gayundin ang pagbibigay ng kaalaman sa mga residente na tipunin ang basura ng maayos at paghihiwa-hiwalay ito. Malaking bagay ang pagbibigay kaalaman hinggil sa Republic Act 9003 “An Act Providing For An Ecological Solid Waste Management Program, Creating The Necessary Institutional Mechanisms and Incentives, Declaring Certain Acts Prohibited and Providing Penalties, Appropriating Funds Therefor, And For Other Purposes”
Ang Barangay Payatas ay may labing dalawang (12) trak ng basura na pag-aari na ng Barangay Payatas na sa tuwina ay umiikot sa buong barangay upang maitapon sa tama ang basura at hindi naiimbak sa kakalsadahan at kapaligiran na posibleng maging sanhi ng pagkakasakit at pagbabara ng mga kanal.
Kaugnay sa kampanya kontra dengue, ang Barangay Payatas ay nagsasagawa rin ng ‘larvacidal spraying’ sa bawat kabahayan sa buong Payatas at pagkuha ng mga nakakalat o nakatambak na sirang gulong. Ang mga natipon naman na mga tirang pagkain galing sa kusina ng mga sambahayan sa barangay ay ginagamit ding pataba upang tuloy-tuloy na maisulong ang pagtatanim ng mga ‘herbal plants’ at gulay.
Binanggit din ng mabuting ina ng Barangay Payatas na anuman ang gawin nya upang maiangat ang estado ng pamumuhay, mapaganda at mailagay sa mabuti ang kanilang lugar ay hindi pa rin magiging matagumpay kung walang pakikiisa at pagtangkilik ang mga residente at nasa sarili rin aniya ang pagsisimula ng pagbabago.
Sa darating na ika-11 ng Oktubre ay isa na namang katuparan ng kanyang mga pangarap para sa kanyang barangay ang magaganap kasabay ng kanyang kaarawan at yan ay ang pagpapasinaya ng Barangay Hall sa Bulacan Hills Street, Group 3.#
