Nagpatupad ang National Housing Authority (NHA) ng isang buwang moratorium o suspensyon sa pagbabayad ng housing loan amortization at lease para sa buwan ng Nobyembre 2025. Layunin nito na pagaanin ang pasanin ng libu-libong benepisyaryo nito sa mahigit kalahati ng bansa na sinalanta ng magkasunod na Bagyong Tino at Uwan.
Ayon sa NHA, ang moratorium ay awtomatikong ipinagkakaloob sa lahat ng residential account holders nito sa mga Rehiyon 1, 2, 3, 4, 5, 6, 7, 8, National Capital Region (NCR), Negros Island Region (NIR), Cordillera Administrative Region (CAR), CARAGA (Rehiyon 13), at sa lalawigan ng Palawan. Ito ay alinsunod sa mga alituntunin na inilabas sa ilalim ng Memorandum Circular No. 2025-172 at 2025-173.
“Bilang pagtalima sa direktiba ni Pangulong Ferdinand ‘Bongbong’ R. Marcos, Jr. na magbigay ng tulong sa mga pamilyang apektado ng mga kalamidad… agaran po tayong nagpatupad ng isang buwang moratorium para sa ating mga benepisyaryo,” pahayag ni NHA General Manager Joeben A. Tai.
Teknikal na Detalye ng Moratorium:
- Saklaw ng suspensyon ang lahat ng bayarin na dapat mabayaran mula Nobyembre 1 hanggang 31, 2025.
- Walang ipapatong na delinquency o dagdag na interes sa panahon ng suspensyon.
- Ang anumang bayaring maibigay sa loob ng moratorium ay ia-apply batay sa umiiral na hierarchy of payments ng ahensya.
- Ang regular na koleksyon ng amortisyon, lease, kasama na ang mga parusa at interes, ay magpapatuloy muli sa Disyembre 1, 2025.
Binigyang-diin ng NHA na ang hakbang ay para makatulong sa mga pamilya na makapag-focus sa pagbangon at pag-aayos ng kanilang mga tahanan at buhay nang walang dagdag na alalahanin sa bayarin. Ito na ang ika-apat at ikalimang moratorium ng ahensya sa loob ng taon, kasunod ng mga naunang suspensyon para sa mga biktima ng Habagat at iba pang bagyo at lindol.
Sa pamamagitan ng inisyatibong ito, pinatitibay ng NHA, isang ahensyang nakakabit sa Department of Human Settlements and Urban Development (DHSUD), ang kanilang pangako na tumulong at umagapay sa mga benepisyaryo sa panahon ng matinding pangangailangan at kalamidad.#
