Bilang bahagi ng patuloy na pagsusulong ng pamantayan, pananagutan, at pagpapabuti sa regulasyon ng mga Social Welfare and Development Agencies (SWDAs), nagsagawa ang Standards Bureau (SB) ng isang “Knowledge Sharing Session Cum Kumustahan” nitong ika-22 hanggang ika-24 ng Oktubre, 2025 sa Best Western Plus Hotel Subic.
Ang tatlong araw na aktibidad ay pangunahing tumalakay sa Draft Handling of Complaints Manual alinsunod sa DSWD Memorandum Circular No. 18, Series of 2024.
Layunin ng nasabing “writeshop” o masinop na pagsasanay na isaayos at patatagin ang Manual sa Paghawak ng mga Reklamo. Nilalayon nitong gawing pamantayan ang mga pamamaraan, itaguyod ang paggawa ng desisyon batay sa ebidensya, at paigtingin ang pagpapatupad ng umiiral na mga batas at regulasyon laban sa mga ahensya at organisasyong lumalabag.
Ang aktibidad ay pinangunahan ni Assistant Secretary para sa Regulatory Services, at Institutional Development Group (RSIDG) na si Janet P. Armas CESO IV. Sa kanyang pambungad na pananalita, ipinaabot niya ang kanyang buong-pusong suporta at paghikayat sa mga kalahok tungo sa isang mas mabilis, maalam, at transparent na sistema ng regulasyon.
Dumalo rin sa mahalagang pagpupulong ang mga kinatawan mula sa Standards Sections ng iba’t ibang DSWD Field Office sa buong bansa.
Sa pamamagitan ng inisyatibong ito, patuloy na itinataguyod ng Kagawaran ang kanyang mandato na tiyaking ang pamamahala ng mga reklamo ay maging isang mabisang kasangkapan para sa transparency, pananagutan, at paghahatid ng de-kalidad na serbisyo sa gitna ng mga SWDA.#
