Nagsasagawa ngayon ang Manila Water Company ng isang mahalagang proyekto upang ilipat ang isang pangunahing pipeline sa kahabaan ng Meralco Avenue at Shaw Boulevard dito sa lungsod. Ang hakbang na ito ay bilang suporta sa ipinatatayong Metro Manila Subway Project ng Department of Transportation (DOTr).
Sakop ng proyekto ang paglilipat ng isang 600mm steel pipeline, kabilang ang open-trench excavation, paglalagay ng bagong tubo, pagkonekta sa mga kasalukuyang linya, at ang kompletong pag-aayos ng mga lugar na apektado. Nagkakahalaga ito ng mahigit ₱49 milyon, na sinimulan noong ikalawang bahagi ng 2025 at inaasahang matatapos sa ikatlong bahagi ng 2026.
Layunin ng nasabing proyekto na maiwasan ang anumang posibleng pagkagambala sa serbisyo ng tubig sa mga lugar na apektado habang isinasagawa ang konstruksyon ng subway. Tinitiyak ng Manila Water na mananatiling maaasahan at tuloy-tuloy ang supply ng tubig sa mga mamamayan.
Upang mabawasan ang epekto sa daloy ng trapiko, ang mga gawain sa Oranbo Drive ay isasagawa nang 24 oras sa pitong araw ng linggo. Samantala, ang mga gawain sa Capt. Henry Javier Street naman ay isasagawa mula 11:00 ng gabi hanggang 4:00 ng umaga. Isang linya ng kalsada ang pansamantalang isasara sa mga oras na ito, at magpapatupad ng stop-and-go scheme.
Sa pakikipag-ugnayan sa pamahalaang lungsod ng Pasig, naglagay na ang Manila Water ng mga babala, bollard, at board-up upang masiguro ang kaligtasan ng mga motorista at pedestrian.
“Suportado natin ang mga programa ng gobyerno sa imprastruktura, ngunit tinitiyak nating patuloy na makakatanggap ng de-kalidad na serbisyo ng tubig ang aming mga customer,” pahayag ni Jeric Sevilla, Communication Affairs Group Director ng Manila Water.
Hinihiling ng Manila Water ang pang-unawa at pasensya ng publiko habang isinasagawa ang proyekto. Pinatitibay nito ang kanilang pangako na makapagbigay ng ligtas, maaasahan, at walang patid na serbisyo ng tubig sa mga komunidad.#
