Sa isang mainit na talakayan sa programang Opinyon Online, iginiit nina kilalang komentarista na sina Herman Laurel at Ado Paglinawan na lumalala ang krisis sa bansa dahil sa pinagsamang epekto ng katiwalian sa gobyerno at panghihimasok ng mga banyagang interes.
Tinukoy ni Laurel na hindi maikakaila ang malawakang korapsyon sa pamahalaan na direktang nakaaapekto sa kumpiyansa ng mga mamumuhunan. Giit niya, “Kapag ang gobyerno mismo ang puno ng katiwalian, paano pa maniniwala ang mga negosyante na ligtas at patas ang sistema?”
Ibinanggit niya ang malaking pagkalugi ng stock market at mabagal na pag-usad ng ekonomiya bilang malinaw na senyales ng paglala ng krisis sa pamamahala.
Ayon naman kay Paglinawan, malaki rin ang papel ng impluwensiya ng mga banyagang interes, lalo na mula sa Kanluran, sa paghubog ng opinyong pampubliko sa Pilipinas. Aniya, “May mga isyung lumalaki hindi dahil sa katotohanan kundi dahil sa kontrolado ng banyagang media at mga grupong may agenda.”
Tinukoy rin niya na ginagawang “proxy battleground” ang Pilipinas sa tensyon ng mga makapangyarihang bansa, lalo na sa usapin ng West Philippine Sea.
Parehong binatikos ng dalawang komentarista ang naging hakbang ng International Criminal Court laban kay dating Pangulong Rodrigo Duterte. Para kay Laurel, ito ay “political persecution” at hindi tunay na paghahatid ng hustisya.
Dagdag pa ni Paglinawan, “Ginagamit ng mga banyaga ang ICC bilang sandata laban sa mga lider na hindi nila kontrolado.”
Sa pagtatapos ng diskusyon, nanawagan sina Laurel at Paglinawan ng mas matatag na pambansang liderato at pagbabalik ng tunay na independiyenteng patakarang panlabas. Iginiit nilang dapat unahin ng pamahalaan ang interes ng mga Pilipino kaysa sa dikta ng mga banyagang bansa.
Sa talakayan nina Herman Laurel at Ado Paglinawan, binigyang-diin nila na ang korapsyon, panghihimasok ng banyaga, at mahinang pamamahala ang pangunahing dahilan ng kasalukuyang krisis sa bansa. Hinimok nila ang publiko na maging mapanuri at igiit ang pambansang soberanya.#
