Inanunsyo ng Federation of Filipino Chinese Chambers of Commerce and Industry, Inc. (FFCCCII) ang paglulunsad ng “1-2 Minutes TikTok Video Competition” bilang bahagi ng pagdiriwang ng ika-50 anibersaryo ng diplomatic relations sa pagitan ng Pilipinas at China.
Sa ginanap na press conference sa Pandesal Forum ng Kamuning Bakery Café, binigyang-diin ng bagong halal na Pangulo ng FFCCCII na si Victor Lim ang kahalagahan ng pagpapatibay ng ugnayan ng dalawang bansa, na may mahigit isang libong taon ng ugnayang pangkultura at pang-ekonomiya. Layunin ng patimpalak na hikayatin ang kabataang Pilipino na itampok ang mahahalagang tagumpay, kwento, at mga pangarap para sa hinaharap ng makasaysayang relasyon ng Pilipinas at China.
50 Taon ng Diplomatikong Ugnayan ng Pilipinas at Tsina
Sa taong ito, ginugunita ng Pilipinas at Tsina ang ika-50 anibersaryo ng kanilang diplomatikong ugnayan, na itinatag noong Hunyo 9, 1975. Ngunit ayon sa FFCCCII, lagpas pa sa limampung taon ang koneksyon ng dalawang bansa—ito ay nakaugat sa mahigit isang libong taon ng kasaysayan, kalakalan, at palitang kultural.
Hinimok din ng FFCCCII ang mas matibay na kooperasyon sa Tsina sa larangan ng kalakalan, pamumuhunan, imprastruktura, turismo, at teknolohiya—mga sektor na kinakailangan upang mapanatili ang kompetitibidad ng Pilipinas sa rehiyon ng ASEAN.
Ang Federation of Filipino Chinese Chambers of Commerce and Industry, Inc. (FFCCCII) ay kinikilalang isa sa mga nangungunang organisasyong pang-negosyo at sibiko sa bansa, na may layuning isulong ang paglago ng ekonomiya, palitang kultural, at napapanatiling kaunlaran sa Pilipinas.
Sa pamamagitan ng mga proyektong pangkabuhayan, serbisyong panlipunan, at pakikipagtulungan sa pamahalaan at iba’t ibang sektor, patuloy ang FFCCCII sa pagiging aktibong katuwang sa pagpapaunlad ng bansa.
Malaki rin ang ambag ng organisasyon sa pagpapalakas ng ugnayang Pilipino at Tsino sa larangan ng kalakalan, edukasyon, at kultura—isang ugnayang higit pa sa negosyo, kundi isang tulay ng pagkakaibigan at pagkakaisa ng dalawang bayan.
Ayon sa pamunuan ng FFCCCII, mananatili silang nakatuon sa pagtulong sa mga lokal na negosyo, paglikha ng trabaho, at pagpapasigla ng mga inisyatibang makatao at makabansa, upang maisulong ang isang maunlad, inklusibo, at matatag na Pilipinas.
Bilang bahagi ng pagdiriwang, inilunsad ng FFCCCII ang isang makabagong aktibidad para sa kabataan: ang Youth TikTok Video Competition. Layunin nito ang hikayatin ang mga kabataang Pilipino na maging bahagi ng kasaysayan sa pamamagitan ng malikhaing video content.
Ang Youth Tiktok Video Competition ay bukas sa mga Pilipino edad 18-35 na tumatalakay sa mahahalagang tagpo sa kasaysayan ng relasyon ng Pilipinas at Tsina; Personal o pangkomunidad na kuwento ng pagkakaibigan at pagtutulungan; Malikhaing pagsasalarawan ng pinag-isang kultura at kasaysayan; Pananaw para sa mas matatag na ugnayang bilateral.
I-upload lamang ang video sa TikTok gamit ang hashtag #PHChina50Years at i-tag ang @ffcccII.official, na nasa 1-2 minutong TikTok video (patayo, MP4 format). Maaaring gumamit ng kahit anong wikang Filipino pero kailangang may English subtitles. Ang huling Araw ng Pagsumite ay sa Mayo 27, 2025
Magrehistro at isumite ang entry sa pamamagitan ng opisyal na QR code na makikita sa mga poster ng FFCCCII.
Makatatanggap ng mga premyo ang mananalo na ia-anunsyo sa Hunyo 8, 2025, ilang araw bago ang ika-9 ng Hunyo na diplomatic anniversary:
🏆 Unang Gantimpala – ₱100,000
🥈 Ikalawang Gantimpala – ₱50,000
🥉 Ikatlong Gantimpala – ₱30,000
🎖️ 10 Consolation Prizes – ₱10,000 bawat isa
🌟 3 Special Citations – ₱20,000 bawat isa
Hinimok ni Pangulong Lim ang kabataang Pilipino na makibahagi sa kompetisyon: “Ito ang inyong pagkakataon na ipagdiwang ang ating pinagsasaluhang kasaysayan sa pamamagitan ng pagkamalikhain. Nawa’y magsilbing inspirasyon ang inyong mga TikTok videos para sa pagkakaisa at mas maliwanag na kinabukasan ng relasyong Pilipinas at China.”
Bahagi ito ng adbokasiya ng FFCCCII sa pagsusulong ng inklusibo at pangmatagalang kaunlaran para sa bansa.#
