Malinis, maaasahang suplay ng tubig at episyenteng serbisyo sa wastewater ang pundasyon ng tagumpay ng anumang investment hub. Sa Clark Freeport Zone (CFZ) sa Pampanga—isa sa pangunahing sentro ng pag-unlad sa Luzon—ginagampanan ng Clark Water, isang operating unit ng Manila Water sa labas ng East Zone, ang mahalagang papel sa pagsusulong ng kaunlarang pang-ekonomiya sa pamamagitan ng sustainable water management.
Bilang pangunahing katuwang ng Clark Development Corporation (CDC), nakatuon ang Clark Water sa pagbibigay ng dekalidad na serbisyo sa tubig at wastewater para sa mga negosyo, residente, manggagawa, at turista sa lugar. Sa pamamagitan ng inobasyon, episyenteng operasyon, at tuloy-tuloy na pagpapahusay ng serbisyo, pinalalakas ng kompanya ang pagiging kaakit-akit ng Clark sa mga mamumuhunan at pinabubuti ang kalidad ng pamumuhay sa zone.
Mula nang bilhin ito ng Manila Water noong 2011, mahigit ₱4.2 bilyon na ang ipinuhunan ng Clark Water sa capital expenditures upang i-modernisa at palawakin ang water at wastewater infrastructure sa CFZ. Kabilang sa mga ito ang pagtatayo ng mga bagong pasilidad, pagsasaayos ng mga kasalukuyang sistema, at pagpapabuti ng distribution networks—lahat ay may layuning makamit ang episyenteng operasyon at pangmatagalang serbisyo.
Mga makabuluhang resulta:
- 24/7 na suplay ng tubig
- 100% coverage para sa parehong water supply at wastewater services
- 100% pagsunod sa DOH Philippine National Standards for Drinking Water at DENR Administrative Order 2021-19 on Effluent
- 6% Non-Revenue Water (NRW)—isa sa pinakamababa sa industriya
Patuloy na natutugunan at nalalampasan ng Clark Water ang kanilang mga obligasyon sa serbisyo. Sa pamamagitan ng matatag na pakikipagtulungan sa CDC at pagtutok sa kahusayan sa operasyon, nananatiling mataas ang antas ng produktibidad ng kompanya habang natutupad ang kanilang mga estratehikong layunin.
“Ang patuloy na pagpapalawak at pag-upgrade ng Clark Water ay nagsisiguro ng tuloy-tuloy, maaasahan, at mataas na kalidad na serbisyo sa tubig at wastewater, na tumutugon sa lumalawak na pangangailangan ng mga negosyo at komunidad sa Clark Freeport Zone,” ayon kay Atty. Agnes Devanadera, Pangulo at CEO ng CDC. “Ang kanilang dedikasyon ay nagpapalakas sa pundasyon ng pamumuhunan at pangmatagalang kaunlaran.”
Ayon naman kay Lyn Joceffin Zamora, General Manager ng Clark Water, “Bagama’t marami na kaming narating, tuloy pa rin ang aming misyon. Nakatuon kami sa patuloy na inobasyon at masigasig na serbisyo para matugunan ang lumalaking pangangailangan para sa malinis, accessible na tubig at sustainable wastewater management. Sa patuloy na pag-unlad ng CFZ sa pangunguna ng CDC, mas mahalaga pa ngayon ang pagpapanatili ng mahusay na serbisyo.”
Higit pa sa imprastruktura, malalim din ang pangako ng Clark Water sa sustainability. Isinasama ng kompanya ang mga aspektong pangkalikasan, panlipunan, at pang-ekonomiya sa kanilang operasyon. Kabilang dito ang mga programang nakatuon sa kapakanan ng komunidad, edukasyong pangkalikasan, at paggamit ng renewable energy. Ang mga solar power projects nila ay nakatutulong upang mabawasan ang carbon footprint habang pinapataas ang energy efficiency.
Sa kasalukuyan, pinaglilingkuran ng Clark Water ang 1,191 locators sa Clark Freeport Zone—isang rehiyong patuloy na umuunlad bilang world-class aerotropolis at pangunahing destinasyon para sa MICE (Meetings, Incentives, Conferences, Exhibits) at turismo. Habang lumalawak ang zone, naghahanda na ang Clark Water sa pamamagitan ng isang makabago at matibay na estratehiya upang matiyak ang tuluy-tuloy, matatag, at sustainable na serbisyo para sa mga kasalukuyan at hinaharap na locators.
