Nagpahayag ng suporta sa pamahalaan partikular kay Pangulong Bongbong Marcos ang People’s Alliance for Democracy and Reform (PADER) sa pamamagitan ng paglagda ng isang Manipesto ng limangpung (50) lider mula sa iba’t-ibang alyansa at sektor galing sa magkakaibang lalawigan ng Pilipinas.
Mariin nilang kinokondena ang mga grupo o indibidwal na kumokontra sa Pangulo gaya ng ilang personalidad na anila ay sumuporta rin kay dating Pangulong Rodrigo Duterte dahil sa patuloy na pagpapakalakat umano ng kasinungalingan sa halip na pagkaisahin ang sambayanan. Dagdag pa nila, huwag umano iasa sa gobyerno ang pagpapakain sa pamilya kundi matutong maging mapamaraan at masipag.
“Ang ating dakilang adhikain at tungkulin sa ating makasaysayang pagkakaisa ay para palakasin ang ating bansa at lubos na itinataguyod at nagtatanggol sa mandato ng taumbayan na ipinagkaloob sa ating mahal na Pangulong Ferdinand “Bongbong” Romualdez Marcos Jr. sa pagtitiyak ng isang Bagong Pilipinas para sa magandang kinabukasan ng mga kabataan at mamamayang Pilipino. Bilang isang nagkakaisang koalisyon, kami ay naninidigan kasama ang mamamayang Pilipino sa isang pagpapakita ng matatag na pagkakaisa para sa pagnanais ng tuloy-tuloy na kapayapaan at kaunlaran ng ating bansa sa pamumuno ni PBBM,” ayon sa pinirmahang manipesto ng koalisyon.
Nangako rin ang koalisyon na PADER, na maninindigan kasama ang mamamayan at pamahalaan sa pagtitiyak ng isang maayos na pamamahala, mapayapang pamayanan at maunlad na kinabukasan para sa sambayanang Pilipino.
Buung-buo ang tiwala ng mga lider na dumalo kay Pangulong BongBong Marcos Jr. at naniniwala sila na hindi kailanman bibiguhin ng mahal na Pangulo ang kanyang sinumpahang tungkulin sa bayan.#
